Publicidad

viernes, 21 de junio de 2013

«Non imos deixar que intereses persoais manden en Trives»

Leva dous anos liderando un goberno de Trives en minoría, despois dunha primeira estadía de apenas doce meses. Máis o momento económico é diferente. Tamén os gobernos de Xunta e Estado. Todo inflúe, segundo di Francisco Fernández, da Agrupación Trivesa Independente, no traballo do día a día.
-¿Que valoración fai deste tempo?
-Foron dous anos convulsos; pola situación externa do Concello, porque estamos gobernados a golpe de decreto a nivel nacional, estamos totalmente intervidos polo Goberno, e a marxe de manobra é escasa; e tamén pola situación interna, gobernar en minoría imposibilita desenrolar o programa. Sobre todo co fundamentalismo que exerce a oposición.
-¿A que se refire?
-Fundamentalismo do non sistemático, de non deixar facer. Cando posturas ideolóxicas tan dispares como PP e PSOE votan no mesmo sentido, será que estamos facendo as cousas ben. Se sumamos as trabas desde dentro do Concello, que se non poñen as cousas máis difíciles, bastante é sobrevivir.
-¿Os que quedan serán dous anos para sobrevivir ou para tirar a toalla?
-Cos anos un faise máis forte á adversidade. Non imos deixar que intereses persoais gañen no Concello. Non vou nin vamos tirar a toalla; a pesar de que se faga costa arriba. Iso seguro.
-¿Que diferenza hai entre estes dous anos de mandato e os dous primeiros do mandato anterior?
-O anterior foi un ano na alcaldía [despois PP e PSOE presentaron unha moción de censura], esta vez son dous. ¿As diferenzas? Os condicionantes exteriores eran outros, había outro goberno da Xunta e do Estado, e outra situación económica. Desde o punto de vista interno, os nomes [en PP e PSOE] cambiaron, pero a situación permanece. O anterior mandato acabou como acabou... As limitacións de agora non son só pola minoría, tamén a situación económica actual condiciona. Pero tamén é certo que nas anteriores eleccións non fomos a lista máis votada. Esta vez gañamos.
-¿Teme que se repita unha moción de censura?
-A espada de Damocles está no día a día, pero confío na palabra do edil socialista, que dixo nun pleno, e consta na acta, que non habería moción de censura.
-Valore á oposición...
-A oposición cumpre a parte fiscalizadora. Están ao día a día de todo, decretos, facturas, incluso do gasto teléfono dos concelleiros... Non poden dicir que non teñen acceso á información. Pero incumpren una parte esencial, a capacidade creativa, de facer propostas. Non presentaron unha soa moción neste tempo que non fora a de pedir o pago da débeda á mancomunidade. ¡A única que presentan vai contra os intereses do concello! Non propuxeron absolutamente nada.
-¿Que dous anos cre que lle esperan a Trives?
-Agardo que bastante mellores que estes. As expectativas que temos desde o Concello é que continuamente presentamos proxectos a subvencións, para que se copaguen desde a Xunta. Ademais, nesta campaña de inverno, a estación de esquí terá novidades. Serán cousas que farán de Trives un concello atractivo para vir e tamén para quedarse a vivir.
Francisco José Fernández alcalde

No hay comentarios:

Publicar un comentario