Trives acollerá o quinto congreso Manuel Luís Acuña

A Casa da Cultura de Trives acollerá, entre o 25 e o 27 de outubro, a quinta edición do Congreso Manuel Luís Acuña. O programa provisional foi presentado hoxe no Campus de Ourense e está previsto que as ponencias se centren «Nos tempos en que Acuña era bacharel», como indica o título do congreso universitario, e en aspectos como a historia dos diferentes modelos educativos galegos, a relación de Valentín Paz-Andrade coa comarca de Trives ou a figura de Celso Emilio Ferreiro, coincidindo cos actos do centenario do seu nacemento. Exposicións, presentacións de libros e proxeccións de material audiovisual completarán o congreso, que abre o prazo para presentar ponencias ao mesmo.

Fuente: La Voz de Galicia